Orat Tutur Kalak Karo

BAB I
ORAT TUTUR I BAS PERKADE-KADEN RAS SANGKEP NGGELUH KALAK KARO

1. MEHERGA si jadi MERGA e me pengelompoken kalak Karo rikutken garis keturunen tertentu.
Lit 5 (lima) cabang keturunen, e me:

1. Karo-Karo,
2. Ginting, 
3. Tarigan,
4. Sembiring, 
5. Perangin-angin.

Tep-tep cabang keturunen enda lit ka terpuk-terpukna. Kerina anak si dilaki lit mergana ras kerina anak si diberu lit beruna rikutken salah sada ibas merga si lima ndai.

2. TUTUR e me ngataken ntah netapken hubungen perkade-kaden (kekrabatan) i bas kalak Karo. Lit 3 (telu) batang belin tutur si niikataken "SANGKEP SI TELU", e me:

1. SENINA
2. KALIMBUBU
3. ANAK BERU

Tep-tep "AKU" lit seninana, kalimbubu, ras anak beruna. Teluna unsur-unsur kekrabaten la terpisahken nandangi "Aku" sabab iketen perkade-kaden ras fungsional. Teluna unsur enda si runggu i bas ngoratken kerina "Aku" i bas keriahen ras kepiceten. E maka teluna unsur enda igelari sangkep si telu ntah rakut si telu. Ia sada perangkat si lengkap ntah sangkep nandangi "Aku" si ngerakut geluh "Aku" gelah jadi nteguh, paguh ras megegeh (utuh).

E maka situhuna kalak Karo enda merupaken sada keluarga besar nge, sabab adi sioraten kenca sekalak kalak Karo ras kalak Karo si deban (si lenga ia sitandan), pasti kari dat hubungen perkade-kaden, ntah pe biak anak beru (enda me ikataken rakut si telu = tiga ikatan) i bas kalak Karo. Maka dat rakutna e (hubungen perkade-kaden), tentu ertutur me ia duana:
a. Kai kin mergandu/beru kai kin kam?
b. Bebere kai kam (beru kai nandenta?)
c. Kempu kai kam (bebere kai nandenta)?
d. Kai binuangndu (bebere kai bapanta)?
e. Kai kampahndu (bebere kai nini bulang si mupus bapanta)?
f. Kai solerndu (kempu kai nandenta)?

Alu sioraten/ertutur bage, maka mis dat hubungen perkade-kaden, ntah kin ia ersenina, erkalimbubu, ntah pe er-anak beru

3. Gelah banci ierti kuga hubungen "AKU" nandangi si deban, e maka lit istilah-istilah buena lit 8 (waluh) penggelaren, e me kap si niikataken "TUTUR SI WALUH" e me:

1. SEMBUYAK
2. SENINA
3. SENINA SIPEMEREN
4. SENINA SIPARIBNEN
5. ANAK BERU
6. ANAK BERU MENTERI (MINTERI)
7. KALIMBUBU
8. PUANG KALIMBUBU

-------------------------------------------------------------------------------------------

Penjelasen:
1. SENINA, ertina SADA NININTA
  a. Si seh ku sukut:
     1) SEMBUYAK >e me seri ras terpuk merga "Aku",
         umpamana Sembiring Pelawi ras Sembiring Pelawi.
     2) GAMET/SENINA KU RANAN >
         I bas si sada cabang merga nari tapi la seri terpukna,
         umpamana Tarigan Tua ras Tarigan Sibero
   b. Si erkelang ku "Aku".
     1) Si pemeren > e me adi nande "Aku"
         senina ras nandena, ntah pe bali beberena.
     2) Si paribanen > e me adi ndehara "Aku"
         senina ntah sembuyak ras ndeharana.
     3) Si pengalon > "Aku" ras ia senina erkiteken
         anakna pekepar tersereh man kalak si sembuyak.
         Duana ersenina erkiteken enggo ersada anak beruna erkiteken
         anakna tersereh.
     4) Si sendalanen > Senina erkiteken impal "Aku" iempoina,
         ntah pe ia enggo jadi kela mami "Aku"


2. ANAK BERU
  a. Anak Beru seh ku sukut, e me:
     1) Anak Beru Iangkip/Iampu > e me adi "Aku"
         tersereh man sekalak si biak impalna. Adi la man si biak impalna,
         igelari si empo e anak beru iperdemui.

     2) Anak Beru dareh/Anak Beru Jabu/Anak Beru Ipupus >
         e me anak dilaki si nipupus anak si diberu "Aku"
         ntah anak turang "Aku" banci ka pe kempu "Aku" ntah bebere "Aku"

     3) Anak Beru Cekuh Baka > e me kap si enggo dua kali erturut-turut
         ngempoi ibas diri "Aku" nari, umpamana adi anak beru dareh
         iempoina anak "Aku". Anak beru cekuh baka me si banci
         muka tutup baka ingan kalimbubu nimpan barang2 si meherga.
         Ia me si ertanggung-jawab i bas perlingeren kerja.

     4) ANAK BERU TUA (ABT)
        Terbagi 3 (telu) terpuk e me:
        a) ABT Jabu > e me anak beru mulai ibas nini bulang "Aku" nari
            seh ku tertuan. ABT enda me si njemak ranan i bas kerina runggun adat
            i bas jabu kalimbubu.
        b) ABT Kesain > e me sada cabang merga si enggo itetapken jadi
            ABT i bas kesain ras kesusurenna menai asum manteki kesain.
        c) Anak Beru Kuta/Anak Beru Si Ngian Rudang > e me kap kalak si enggo
            itetapken jadi anak beru asum manteki kuta. Kesusurenna pe tetap jadi
            anak beru kuta.

  b. Anak Beru Erkelang Ku Sukut :
    1) Anak Beru Si Pemeren > e me anak beru senina si pemeren ibas "Aku" nari,
        dalanna "Aku" eranak beru man bana sabab ia anak beru senina
        sipemerenna.
    2) Anak Beru Minteri, asalna ibas kata 'pinter' nari. Ia e me kap ansk beru ibas
        anak beru "Aku" nari. Ibss runggun ia mereken kata pinter, pepinter
        si nggeduk denga.
    3) Anak Beru Si Ngukuri > e me nak beru ibas anak beru minteri nari


3. KALIMBUBU
E me si mereken ndehara (anak dara) man "Aku" ngikuti garis ku das, ku samping ras ku teruh. Kalimbubu i percayai kalak Karo ulu tuah e me igelari ia "dibata ni idah", ntah si mupus takal piher, si meteh pate geluh. Sabab ia maba ose man anak beruna asum anak beruna erbahan lakon nurun-nurun, lakon kepaten cawir metua, ntah pe erpangir ku lau

A. KALIMBUBU SI IPERDEMUI > igelari pe kalimbubu si erkimbang, ntah pe si maba ose e me kap bapa ndehara ntah turang ndehara "Aku" igelari si maba ose.
Ia maba ose man anak beruna asum anak beruna erbahan lakon nurun2, lakon kepaten cawir metua, ntah pe erpangir ku lau.

B. KALIMBUBU SI MADA DAREH > e me kap bapa ntah turang nande "Aku". Ibas kerja2 kalak Karo kalimbubu enda salih gelarna sue ras bentuk lakon, e me kap:
1) Kalimbubu Si Ngalo Ulu Emas > e me kap i bas lakon perjabun beberena si
    dilaki asum e ia ngalo ulu emas.
2) Kalimbubu Si Ngalo Bere-Bere > e me kap asum perjabun beberena si diberu
    asum e ia ngalo bebere.
3) Kalimbubu Si Ngalo Maneh-Maneh > Adi beberena si dilaki ntah turangna mate
    janah enggo cawir metua, lanai lit anakna si lenga erjabu,
    maka kedudukenna: ia me kap si ngalo maneh2. Adi beberena si dilaki mate
    ialokenna bajuna tambah batuna. Adi diberu si mate ialokenna uis teba tambah
    batuna.
4) Kalimbubu Si Ngalo Sapu-Sapu Iluh > Adi beberena si dilaki mate ntah
    turangna si mate tapi anak-anak si mate lenga kerina erjabu, maka ia ngaloken
    sapu2 iluh

C. KALIMBUBU BAPA (BINUANG)
Kalimbubu bapa e me si mada dareh bapa. Ia jadi kalimbubu binuang man "Aku". Kalimbubu binuang enda berubah i bas kerja-kerja tertentu:
   1) Kalimbubu si majek dalikan > I bas kerja mengket rumah "Aku" igelari ia
       kalimbu si majek dalikan.
   2) Kalimbubu si ngalo perkempun > Asum anak "Aku" tersereh maka kalimbubu
       bapa "Aku" jadi si ngslo perkempun. Lit versi singgelarisa kalimbubu si ngalo
       perninin (Kenjulu: puang kalimbubu arah arah nande)

D. KALIMBUBU BENA-BENA > e me kalimbubu si mada dareh nini "Aku".

E. KALIMBUBU TUA
Lit 3 (telu) erbage:
   1) Kalimbubu tua jabu > e me kap adi ia enggo rindih-indih jadi Kalimbubu mulai
       ibas nini empung nari.
   2) Kalimbubu tua kesain > e me kesusuren kalimbubu si nai asum manteki
       kesain ijafiken kalimbubu.
   3) Kalimbubu kuta > e me kalimbubu si nuanken/majekken lulang asum
       manteki kuta.

F. KALIMBUBU ERKELANG KU SUKUT
1) Puang Kalimbubu > e me ksp kalimbubu ibas kalimbubu "Aku" nari. Adi "Aku" nereh mska puang kalimbubu si ngalo perninin (lit versi si ngatakenca si ngslo perkempun).
2) Klimbubu si ngslo morah-morah > Lit versi si ngatskenca, maka adi anak beruna mate ntah dilaki ntahsa diberu maka ia si ngalo morah2.
3) Puang ni puang > e me kalimbubu ni puang kalimbubu
4) Kalimbubu erkiteken si pemeren > e me kap senina si pemeren mama "Aku".


4. TUTUR

Ncidahken hubungen perkade-kaden i bas kalak Karo maka tutur si nipalasna merga ras bebere si nibaba sekalak-sekalak maka dat me tingkat keturunen:
1)   Erbapa,
2)   Ernande,
3)   Erbengkila,
4)   Erbibi,
5)   Ermama
6)   Ermami,
7)   Ersenina,  Erturang,
9)   Erimpal,
10) Ersilih,
11) Erbebere,
11) Eranak,
12) Erkempu,
13) Erente,
14) Erentah,
15) Erturangku,
16) Eragi,
17) Erkaka,
18) Erpermen,
19) Ernini bulang,
20) Ernini tudung,
21) Erempung,
22) Erberu

Cataten :
Ertima kita tahap selanjutna.....
Salam mejuah-juah

Kin pe lit salah lepak ntah pe tambahenna,,, ras-ras kita ngarihkensa

Oleh : Pdt Jepta Pelawi

[sumber : https://www.facebook.com/notes/jambur-merga-silima/orat-tutur-i-bas-perkade-kaden-ras-sangkep-nggeluh-kalak-karo/711900012156698]

[sumber photo : http://karosiadi.blogspot.com/2012/01/pieter-adriaan-jacobus-melukis-karo.html]